Nga Boldnews.al
Ardi Veliu, Kryepolici që frymëzon dhunë, që krijoi imazhin e një polici të fortë e arrogant, është kthyer në një drejtor morgu. Ai s´ka lidhje më me pozicionin e Drejtorit të Policisë së Shtetit, nuk ka më lidhje as me detyrën kryesore që ka kjo strukturë për të parandaluar krimin apo ngjarjet e rënda.
Thjesht Ardi Veliu numëron viktimat. Ai shfaqet pasi janë humbur jetë njerëzish, shkon në vendin e ngjarjes njëlloj si ata mjekët e mjekësisë ligjore që konstatojnë shkaqet e vdekjes, apo ekipet e urgjencave që konstatojnë vdekjet.
Në harkun kohor të 48 orëve humbën jetën 8 qytetarë. Tetë viktima, që me pak profesionalizëm në drejtimin e strukturave të policisë do të ishin shmangur.
Katër qytetarët e parë humbën jetën në një aksident tragjik. U vranë teksa udhëtonin në automjetin e tyre duke shkuar për pushime, pa e ditur se një automjet, nga ato luksozët do t´i godiste nga pas me shpejtësi marramendëse. Bilanci tragjik, një familje u shua.
Dikush mund të thotë se ç´faj mund të ketë Kryepolici për aksidentin?
Ardi Veliu me paaftësinë e tij shpërbëu policinë, e ktheu në një strukturë më shumë politike se sa sigurie, injektoi shoë dhe propagandën, njëlloj sikundër veprojnë ministrat dhe Kryeministri.
Siguria rrugore, për të cilën pothuajse çdo ditë raportohen gjobat dhe masat administrative, që trumpetohet dhe flitet për suksese, pothuajse u zhbë, nga ai aksidenti tragjik i ndodhur në aksin Fier-Vlorë.
Pas ngjarjes tragjike, Veliu urdhëron vartësit e tij të dalin në rrugë, njëlloj si ato aksionet e dikurshme me plane, ndërkohë që ato pajisjet si dragera, kamera, dron që promovohen si arritje, nuk ishin vënë në punë, të paktën në akset e zonave turistike, ku edhe një fëmijë e di, që do të ketë një shtim të fluksit të lëvizjeve.
Pak orë pas këtij aksidenti tragjik, një tjetër ngjarje e rëndë ndodh në skajin tjetër. Një përplasje me armë, në një tjetër zonë turistike, Velipojë, shkakton 4 viktima dhe mbeten të plagosur 2 persona. Sërisht pas ngjarjes shfaqet Ardi Veliu, që parakalon para kamerave, a thua se ka shkuar për sfilatë mode.
Shkaku i konfliktit që prodhoi më pas masakrën ishin shezlongjet në plazhe, që janë kthyer në territore ku të “fortë” shpallin pronësinë dhe vijojnë bizneset.
Kjo që ndodhi në Velipojë është pak a shumë si ato përballjet “western” ku kaubojsit në mungesë të sherifit, ftonin njëri tjetrin në duel.
Në rastin konkret sherif është Ardi Veliu dhe çdo vartës i tij, që çdo ditë e më shumë pasqyrojnë paaftësinë, ndoshta jo të tyret personale, por të Kryepolicit, që paaftësinë dhe mediokretin, ia mbulon besnikëria që shfaq ndaj Edi Ramës.
Nëse Ardi Veliu do të ishte pak i zgjuar do të jepte dorëheqjen jo sot, por shumë kohë më parë, atëherë kur u kthye në një vegël politike, më i devotshëm edhe se vetë ministrat e Brendshëm, që të paktën kanë funksione politike.
Sot dorëheqja e Ardi Veliut s´ka më kuptim, pasi për shkak të paaftësisë dhe mediokritetit ka mbjellë jo vetëm pasiguri, por po shkakton viktima, jetë njerëzish që nuk kthehen më.
Nuk dihet se çfarë duhet të ndodhë më shumë që Kryeministri të mos mbajë më nën sqetull një drejtor policie, që nuk logjikon dot as sa një kapter reparti ushtarak të viteve ´80, ndonëse ky i sotmi thuhet se ka përfunduar studimet në Turqi, ka kryer edhe disa trajnime, që duket se nuk i kanë shërbyer aspak për t´u aftësuar profesionalisht.
Ardi Veliu duhet të ikë si i paaftë, si mediokër, si i pazoti për të kryer detyrat, madje pa iu dhënë mundësia, siç ndodh rëndon që të shkojë pedagog në shkollën e policisë, pasi atje mund të shkaktojë të tjera dëme, në formimin e strukturave të ardhshme të Policisë.
