Gjykata e Posaçme ndryshon masën e arrestit për Agustin Selimin, akuzuar për trafik droge dhe shitblerje të votave në zgjedhjet e 25 prillit. Në të njëjtën kohë gjykata ka vlerësuar se bashkëpunëtori i tij në këtë akuzë, Pëllumb Lekaj do të vijojë të qëndrojë në arrest me burg.
Vendimi u dha në seancën e sotme ku dy të pandehurit kishin kërkuar vlerësim të masës së sigurimit.
Dy të hetuarit u kapën në 29 prill me 10 kilogramë kanabis duke tentuar ta trafikonin drejt Greqisë. Hetimet për trafikun e narkotikëve nxorën në përgjime edhe faktin se këta persona kanë qenë të implikuar edhe në shit-blerjen e votave, kryesisht në Shkodër.
