Flamur Manaj, Prefekti i Vlorës, i është bashkuar korrit të kritikëve ndaj Kryebashkiakut Dritan Leli. Manaj nuk ka kursyer kritikat ndaj Lelit në aspektin e marrjes së masave për sezonin turistik, ndërsa ka vlerësuar masat e marra nga Bashkia Sarandë, për të cilën tha se është në normalitet të plotë.
Kritikat ndaj Lelit, Manaj i bëri në prezencë të ministrit të Turizmit, Blendi Klosi, i cili nuk preferoi të bënte komente lidhur me Vlorën, por evidentoi marrjen e masave nga Bashkia Sarandë.
Manaj duket se është rreshtuar në krah të drejtuesve lokalë socialistë, këshilltarëve bashkiakë, deputetëve të Rilindjes për Vlorën, që të gjithë bashkë, nisën sulmet ndaj Dritan Lelit në momentin që ai refuzoi propozimin e Edi Ramës për të lënë mandatin e Kryebashkiakut dhe për të garuar si deputet.
Prej kohësh, ndaj Lelit po tentohet të bëhet një gjyq publik, por duket se Kryebashkiaku ka arritur të shmangë deri më tani përplasjet. Nuk dihet nëse Leli do të përmbyllë deri në fund mandatin e deputetit, në kushtet kur ai po trajtohet si armik në rradhët e Rilindjes së drejtuar nga Edi Rama.
