Britney Spears prej shumë vitesh vuan nga kontrolli i babait mbi jetën dhe financat e saj. Disa dokumente konfidenciale të siguruara nga “New York Times”, tregojnë se këngëtarja për vite me radhë ka kundërshtuar vazhdimisht autoritetin që gjykatat i dhanë babait të saj, Jamie Spears, çka i dha atij kontroll mbi financat dhe jetën e saj personale.
“Ajo artikuloi se ndien që kujdestaria është bërë një mjet shtypës dhe kontrollues kundër saj,” shkroi një hetues gjykate në vitin 2016, sipas raportit të “Times”. “Këngëtarja tha se sistemi kishte ‘shumë kontroll … Shumë, shumë!’“, përmblodhi hetuesi.
Dokumentet u zbuluan një ditë para se këngëtarja të drejtohej publikisht në gjykatë në një seancë dëgjimore për kujdestarinë, një moment i rëndësishëm në një betejë shumëvjeçare për të cilën ajo pothuajse kurrë nuk ka folur drejtpërdrejt.
Megjithatë Spears, përmes avokatit të saj të caktuar nga gjykata, kohët e fundit ka kërkuar më shumë transparencë dhe vitin e kaluar bëri të qartë në gjykatë se ajo nuk dëshiron që i ati të përfshihet në punët e saj.
Në vitin 2016, hetuesi i gjykatës tha se këngëtarja kërkoi që kujdestaria të ndërpritet sa më shpejt të jetë e mundur:
“Asaj i ka ardhur në majë të hundës nga ky përfitim dhe tha se është ajo që punon dhe fiton paratë e saj, por të gjithë janë te lista e pagave”, raportoi “Times”.
Në vitin 2019, këngëtarja i tha gjyqtarit se kujdestari e kishte detyruar të qëndronte në një institucion të shëndetit mendor dhe të performonte kundër vullnetit të saj, sipas gazetës.
Ndërsa ajo po fitonte miliona nga rezidenca e saj në Las Vegas, këngëtares iu dha vetëm 2,000 dollarë ndihmë javore, zbuluan më tej të dhënat. “Times” gjithashtu zbuloi dokumente nga një seancë e mbyllur në vitin 2014, në të cilën avokati i Spears tha se këngëtarja donte heqjen e babait të saj si kujdestar.
Kjo lloj kujdestarie e caktuar nga gjykata për Britney-n, është për njerëzit që nuk mund të marrin më vendime për veten e tyre, tipikisht njerëz të moshuar dhe të dobët. Por kritikët kanë theksuar se rasti i Spears është një shembull abuzimi.
Marrëveshja e saj u krijua pasi ajo pati disa probleme që u bënë publike, mes abuzimeve të forta nga paparacët, të cilët e ndoqën këngëtaren dhe shfrytëzuan betejat e saj të shëndetit mendor.
Këngëtarja ka treguar se i është nënshtruar vlerësimeve të shumta psikike, ilaçeve dhe se është traumatizuar nga babai i saj, Jamie Spears, përmes kontrollit të tij. Ajo ka thënë në gjykatë se nuk ka folur publikisht në lidhje me këtë çështje, sepse mendonte se askush nuk do e besonte.
“Kam gënjyer dhe i kam thënë gjithë botës se jam mirë dhe jam e lumtur… nuk jam mirë. Nuk jam e lumtur, nuk mund të fle. Jam e nevrikosur. Është çmenduri. Dhe jam në depresion. Qaj çdo ditë”, është shprehur Britney.
Gjatë dëshmisë së saj, Birtney ka treguar se dëshiron të martohet dhe të ketë fëmijë në të ardhmen. Por ajo tha se nuk i lejohet të mbetet shtatzënë për shkak të rregullave ligjore, që u vendosën në fuqi në 2008, sepse kujdestarët e saj nuk aprovojnë heqjen e kontrollit të lindjes.
“Së fundmi më thanë se nuk jam në gjendje të martohem ose të kem një fëmijë. Kam një IUD* (Pajisje që ndalon shtatzëninë – pajisje kontraceptive intrauterine) brenda vetes që të mos mbetem shtatzënë. Do doja ta hiqja në mënyrë që të kem një fëmijë tjetër, por kjo e quajtur ‘skuadër’ nuk më lejon të shkoj te mjeku sepse nuk duan që unë të kem fëmijë të tjerë. Me të vërtetë besoj se kjo kujdestari është abuzive”, është shprehur Britney.
