Grupi për Partinë Demokratike ka shprehur shqetësimin e tij në lidhje me vendimet e mbledhjes së zhvilluar së fundmi të Kryesisë së Partisë Demokratike, që u zhvillua pak ditë më parë.
Grupi për PD thotë se analiza e zgjedhjeve të 25 prillit në PD po bëhet në mënyrë që Lulzim Basha të shkarkojë nga vetja përgjegjësitë tek anëtarët e thjeshtë të Partisë, Kryetarët e Degëve dhe Degët e PDSH-së, pa bërë transparencë se çfarë ndodhi me garancitë që dha para zgjedhjeve në lidhje me mbrojtjen e votës së qytetarëve shqiptarë.
Me anë të një letre të bërë publike për mediat paraditen e sotme, ky grup shprehet se: Analiza për “realizimin e objektivave të vendosur për zgjedhjet e 25 prillit 2021” është në kundërshtim të hapur me deklaratat për masakër zgjedhore. Zoti Basha duhet të ndajë mendjen, ose zgjedhjet janë vjedhur ose nuk janë arritur objektivat nga strukturat e Partisë Demokratike dhe deputetet e listës. Në të kundërt ai duhet të pranojë siç është e udhës përgjegjësitë e tij për këtë humbje. Mbledhja e Kuvendit Kombëtar pa mbyllur analizën tregon se qëllimi i vërtetë nuk janë zgjedhjet.
Grupi ‘Për PD’ deklaron se, do të vazhdojë të kërkojë ringritjen e Partisë dhe rimëkëmbjen e saj, afrimin e të gjitha kontributeve dhe bashkimin e Partisë deri në ardhjen sa më parë në pushtet.
