Prokuroria e Tiranës ka hetuar në bashkëpunim me homologët në Zvicër për një rrjet trafikantësh droge që vepronin në shtetin zviceran dhe gjerman, mes të cilëve kanë rezultuar të përfshirë edhe dy shqiptarë.
Burime jo zyrtare nga grupi hetimor bëjnë me dije se drejtuesit e grupit rekrutojnë shtetas shqiptarë dhe i dërgojnë në Zvicër kryesisht për shpërndarjen e kokainës, kundrejt një pagese mujore.
Organizator i këtij grupi është identifikuar shtetasi Ndriçim Harka, punonjës në zjarrfikësen e Tiranës.
Burime bëjnë me dije se për punëtorët që rekrutoheshin për trafikun e drogës, merrnin një pagesë prej 3500 euro. Sipas informacioneve paraprake, janë arrestuar 7 pjesëtarë të këtij grupi kriminal, 5 persona në Zvicër dhe dy në Shqipëri. Burime bëjnë me dije se në kërkim është shpallur dhe organizatori tjetër, kunat i Harkas, i cili dyshohet të ketë ikur drejt Greqisë.
Mësohet se bisedat janë kryer nga numra celularë shqiptarë dhe se trafiku kryhej që në vitin 2015. Gjithë trafiku është arritur të zbardhej me përgjime ndaj grupit.
