Partia Drejtësi, Integrim dhe Unitet, Shoqata “Çamëria” si dhe Fondacioni “Hasan Tahsin” kanë çelur aktivitetet në kuadër të “Javës Çame”, që përkujton 77-vjetorin e masakrave greke mbi popullsinë shqiptare të Çamërisë.
Nga sheshi “Skënderbej” ku u vendos instalacioni 3D me gërmat “I Love Çamëria” dhe u çel ekspozita “Çamëria ndër shekuj në harta dhe gravura paraqitur nga historianë dhe artistë të kohës“, kryetari i PDIU, Shpëtim Idrizi përcolli një mesazh për mediat.
Idrizi tha se çështja “Çame” do të rikthehet në Parlamentin e Shqipërisë në shtator, kur deputetët e PDIU të marrin mandatin e ligjvënësve. Kreu i PDIU-së i ka bërë thirrje qytetarëve dhe opinionit publik të mos harrojë Çamërinë, ndërsa shtoi se qeveria dhe politika shqiptare kanë heshtur ndër vite për padrejtësitë që i janë bërë çamëve.
“Jemi në vigjilje të javës Çame për të përkujtuar atë spastrim etnik dhe genocid më të dhunshëm në Ballkan, mbi shqiptarët e Çamërisë, ku mbi 20% u shfaros dhe pjesa tjerë, 90% epopullsisë që mbeti u shpërngul me dhunë në drejtim të Shqipërisë. Kjo është një ditë e njohur dhe nga parlamenti shqiptar, 27 qershori i vitit 1944, për fillimin e masakrave nga krimineli Napolon Zerva, por ne jemi këtu për të kujtuar se pasojat e asaj masakre, kërkesa për drejtësi vazhdon dhe mbi ne pasardhësit e atyre që u shpërngulën nga genocidi dhe u vranë. E them këtë sepse e drejta e jetës, e lëvizjes së lirë të njerëzve, e drejta për t’u kthyer në trojet tona, e drejta pronësore dhe juridike që burojnë nga të drejtat themelore të njeriut, vazhdojnë të ushtrojë pasoja mbi anëtarët e këtij komuniteti. Janë 77 vjet që ka pjesën e dhimbjes njerëzore dhe efektet e saj mbi shkeljet e të drejtave të njeriut dhe ne jemi këtu për të bërë edhe një thirrje për opinionin publik, qeverinë shqiptare, mediat dhe këdo që mos të harroni Çamërinë. Sepse Çamëria është një pjesë shumë e rëndësishme dhe që plotëson hartën identitare të kombit shqiptar, është një padrejtësi që është bërë mbi shqiptarët dhe harresa është vazhdë e padrejtësisë. Sigurisht që është momenti që të ngrejmë zërin edhe karshi heshtjes nga politika shqiptare për çështjen çame. Të heshtësh për çështjen Çame do të thotë të pajtohesh për këtë padrejtësi të madhe historike dhe kjo është arsyeja pse unë dua të theksoj me forcë që rikthimi i çështjes Çame në Parlament nëpërmjet deputetëve të PDIU-së padyshim që do të tentojë ta thyejë dhe nuk do të heshtet më për çështjen e shqiptarëve të Çamërisë. Të gjithë kanë heshtur për çështjen Çame, e gjithë politika shqiptare, qeveria shqiptare, mediat dhe kushdo. Mediat i falenderoj që janë këtu, por Çamëria nuk është vetëm në 27 qershor. Unë dua t’i garantoj të gjithë që ne nuk e harrojmë Çamërinë, nuk i harrojmë miqtë dhe armiqtë e Shqipërisë. Të gjithë ata që mendojnë se ne do të lodhemi, po ju them që ne do të lodhemi të fundit. Do të rikthehet çështja çame në parlamentin e Shqipërisë, do të tentojë të thyejë heshtjen e gjitha institucioneve shqiptare sepse heshtja është pajtim me padrejtësinë që është bërë mbi shqiptarët e Çamërisë”, u shpreh Idrizi.
Për kreun e Fondacionit “Hasan Tahsin”, Alket Veliu ekspozita e çelur në sheshin “Skënderbej” tha se hartat janë dëshmi e gjallë se treva e Çamërisë ka qenë e banuar nga shqiptarët ndër shekuj.
“Java çame fillon sot me vendosjen e gërmave 3D “I Love Çamëria” si dhe me këtë ekspozitë të hartave dhe gravurave të vjetra. Autorë të ndryshëm e kanë pasqyruar Çamërinë në shekullin e XIX dhe më herët si të banuar nga shqiptarët. Dhe ne gjejmë Çamërinë në këto harta të pasqyruar shumë qartë prezenca e shqiptarëve në këto treva”, tha Veliu, duke shtuar se aktivitetet do të vijojnë nesër me një aktivitet homazh për dy personalitetet e Çamërisë, Ibrahim Daut Hoxhën dhe Hektor Sejkon, që humbën jetën gjatë pandemisë.
