Argjentina ka gjetur fitoren e parë në këtë “Copa Amerika” ndaj Uruguait, pas barazimit 1-1 me Kilin në ndeshjen hapëse të turneut.
Në takimin e luajtur në “Mané Garrincha”, ishin “Albiçelestet” ata që krijuan më shumë raste shënimi dhe kontrolluan pothuajse të gjithë ndeshjen kundër një ekipi uruguajan që përfshinte dyshen e fuqishme sulmuese: Luis Suárez dhe Edinson Cavani. Rrugën e rrjetës e gjetën me Guido Rodriguez në minutën e 13 të takimit. I zakonshmi Messi depërtoi në të majtë, duke krosuar për mesfushorin e Betis i cili shënoi me kokë golin e vetëm të këtij takimi.
Argjentina pati të tjera raste mira shënimi me Lautaro Martines, i cili nuk arriti të tregohej i saktë para portës së mbrojtur nga veterani Muslera.
Duke kërkuar një qëndrueshmëri në mbrojtje, Argjentina ndryshoi pothuajse të gjithë prapavijën pas barazimit 1-1 me Kilin. Mbrojtësi i djathtë Gonzalo Montiel, mbrojtësi i qendrës Lucas Martínez Quarta dhe mbrojtësi i majtë Nicolás Tagliafico u zëvendësuan përkatësisht nga Nahuel Molina, Cristian Romero dhe Marcos Acuña. Nicolás Otamendi ishte mbrojtësi i vetëm që mbeti në formacionin starues. Rodriguez zëvendësoi Leandro Paredes, të dëmtuar.
Uruguai nga ana tjetër nuk ishte shumë kërcënuese, duke e mbyllur takimin pa asnjë gjuajtje në kuadrat.
Kështu, Argjentina arrin fitoren e parë nga nëntori i vitit 2020.
Ndeshja e ardhshme e Argjentinës do të jetë kundër Paraguait të Hënën, në të njëjtën ditë kur Uruguaji do të luajë ndeshjen e saj të dytë të turneut, kundër Kilit.
