Dyshimet e marrjes së ryshfetit për lirimin nga akuzat penale çoi pas hekurave prokurorin e Sarandës, Sali Hasa. Ky i fundit u vu në pranga këtë të Shtunë nga policia, që zbatoi masën e dhënë ndaj tij nga Gjykata e Posaçme, me kërkesë të prokurorisë.
Dy ditë më parë, ndaj Sali Hasës, gjykata caktoi masën e sigurisë së arrestit me burg, si i dyshuar për kryerjen e veprës penale të “Korrupsioni pasiv i gjyqtarëve, prokurorëve dhe funksionarëve të tjerë të drejtësisë”.
Burime pranë grupit hetimor bënë me dije se prokurori dyshohet se ka marrë ryshfet për lirimin nga akuzat penale të Emiljano Miranit, ndaj të cilit për të njëjtin hetim është caktuar po ashtu masa e arrestit me burg nga Gjykata e Posaçme, dy ditë më parë.
Më konkretisht, dyshohet se Emiljano Mirani, i cili ka qenë i dyshuar për plagosje të lehtë me dashje dhe mbajtjes së armëve të ftohta, rezulton se përmes motrës Elsona Papa, kanë ndërhyrë te prokurori i Sarandës Sali Hasa. Sipas SPAK, ka dyshime se Mirani dhe Papa kanë paguar para te prokurori me qëllim që ky i fundit ti hiqte akuzat, ç’ka sipas hetimeve, është finalizuar.
Ndaj Emiljano Miranit, po ashtu si ndaj prokurorit, është caktuara masa e sigurisë së arrestit me burg si i dyshuar për kryerjen e veprës penale të “Ushtrimi i ndikimit të paligjshëm ndaj personave që ushtrojnë funksione publike”, kryer në bashkëpunim.
Ndërsa ndaj motrës së tij, Elsona Papa është caktuara masa e arrestit shtëpiak, nën dyshimin për kryerjen e veprës penale të “Ushtrimi i ndikimit të paligjshëm ndaj personave që ushtrojnë funksione publike”.
Masa që janë ekzekutuar këtë të Shtunë nga policia.
Lexo edhe:
