Disa persona të armatosur kanë sulmuar një Universitet Publik në Nigeri, ku kanë rrëmbyer të paktën 80 studentë, shumica prej tyre vajza, sipas CNN.
Oficerët e policisë lajmëruan se pesë mësues u rrëmbyen dhe një oficer policie u vra në një shkëmbim zjarri me autorët e sulmit.
“Ata vranë një polic, thyen portën dhe shkuan drejt e në klasat e studentëve”, tha Usman Aligiou, një profesor në shkollën ku ndodhi sulmi, duke shtuar e shumica e studentëve të rrëmbyer ishin vajza.
Ky është sulmi i tretë që ndodh në më pak se tre javë në Nigerinë veriperëndimore dhe qendrore, që ka synim rrëmbimin e nxënësve apo studentëve.
“Autoritetet po kërkojnë për personat e armatosur që sulmuan Universitetin Publik Birin Youri, në shtetin Kebi”, tha policia në një deklaratë.
Sipas banorëve, personat e armatosur vranë 5 persona, 4 prej të cilëve ishin studentë.
