Ministria e Punëve të Brendshme të Maqedonisë së Veriut njofton se një vrasje ka ndodhur dje në fshatin Vraneshnicë të Kërçovës.
Sipas policisë, djali 25-vjeçar ka therrur me thikë babanë 48 vjeç, që më vonë ka ndërruar jetë në spital.
Ngjarja ka ndodhur mbasditen e së mërkurës ku shtetasi me iniciale A.K (25 vjeç), rreth orës 20:30, në shtëpinë e tij ka plagosur me thikë të atin e tij J.K (48 vjeç), i cili më vonë ka humbur jetën.
“Pas ndërmarrjes së masave është vërtetuar se rasti ka ndodhur pas një përballje fizike ku viktima me pushkë ka kërcënuar birin e tij”,- thuhet në raportin e policisë.
Për këtë rast është njoftuar edhe Prokuroria Publike dhe me urdhër të saj, trupi është dërguar për autopsi. Gjatë mbikëqyrjes së vendit të ngjarjes, janë gjetur edhe pushkë e armë të tjera.
