Rreth 1 javë pas votimit në Kuvend për shkarkimin e Ilir Metës nga posti i Presidentit, të paktën 3 deputetë të asaj që quhej nga Rilindja si “opozita” parlamentare, kanë nisur pushimet.
Në fotot e mëposhtme shfaqen tre “opozitarët” e Ramës, Klajdi Qama, Ylli Shehu dhe Halit Valteri, që kandiduan në siglën e Partisë Socialiste për deputetë në Qarkun e Tiranës në zgjedhjet parlamentare të 25 prillit.
Fotot janë publikuar nga deputeti Halit Valteri në faqen e tij zyrtare në rrjetin social “Instagram”. Nuk dihet se çfarë destinacioni 3 deputetët kanë zgjedhur për pushime, por duket se ata po shijojnë të pasurit e mandatit të ligjvënësit.
Pushimet e 3 ligjvënësve u paralajmëruan javën e shkuar edhe nga Zëdhënësi i Presidentit, pak momente pasi Kuvendi vendosi shkarkimin e Ilir Metës.
“Asnjë surprizë nga tregtari i kufijve të Shqipërisë dhe të Kosovës, partnerët dhe vasalët e oligarkëve, mafia e inceneratorëve, grabitësit e votave, parave dhe të pronave të shqiptarëve, përfshi edhe torollakët e dobishëm, që nuk bënë gjë tjetër sot, veçse plotësuan edhe hapin e fundit të krimit të rëndë zgjedhor të 25 prillit.
Të paktën veç pensionit të përjetshëm, i siguruat edhe për këtë vit një palë pushime qyl!
Bravo ju qoftë, që nuk dolët pa gjë nga kjo shëmti”, shprehej Tedi Blushi.
