Qerim Ismailaj, kryebashkiaku Rilindas i Mallakastrës, rezulton të ketë gënjyer në formularin e dekriminalizimit, duke fshehur kështu dënimin që ka vuajtur në Greqi.
Nga verifikimet e Prokurorisë së Përgjithshme, rezulton se Ismailaj është arrestuar në vitet 1999-2000 dhe është dënuar në shtetin fqinj me 3 vjet heqje lirie.
Në përfundim të hetimeve, Prokuroria thekson se “Deklaruesi Qerim Ismailaj, me funksion kryetar i Bashkisë Mallakastër, rezulton i dënuar me veprim të formës së prerë, për kryerjen e një vepre penale, nga autoriteti gjyqësor i huaj. Referuar vendimit 9-11/2000 të Gjykatës së Përbërë nën Betim të Chios, i formës së prerë, rezulton se i akuzuar Qerim Ismailaj (në mungesë në gjykim), është deklaruar fajtor dhe është dënuar me 3 vite burgim për veprën penale të “Konfliktit”/ “Përleshjes”, parashikuar nga neni 313 i Kodit Penal të Republikës së Greqisë, që i korrespondon veprës penale të “dëmtime të tjera me dashje” parashikuar nga neni 90/1 të Kodit Penal të Republikës së Shqipërisë, e cila si sanksion parashikon dënim vetëm me gjobë”.
Ndërkohë në formular ai nuk e ka deklaruar dënimin, çka bazuar në ligjin e dekriminalizimit përveç humbjes së mandatit do të ndiqet edhe penalisht.
Prokuroria përmes sektorit të saj për dekriminalizimin, nisi verifikimin dhe mori gjurmët e gishtave të kryetarit të bashkisë mallakastër Qerim Ismaliaj.
Reagimi nga Prokuroria erdhi pas bërjes publike nga PD të dokumentit sipas të cilit, Prokurorisë së Athinës, Gjykata e Kiosit, e ka dënuar me 3 vite burg kryebashkiakun e Mallakastrës.
Po ashtu ish-deputeti i PD Enkelejd Alibeaj ka deklaruar më parë se Ismailaj, ka qenë në dijeni për dënimin e tij, dhe se ka shkuar dhe ka tërhequr në Greqi, dosjen e tij penale.
Qerim Ismailaj sipas PD-së, është dënuar më 25 shkurt të vitit 2000 me 3 vite burg nga Gjykata e Kios, për kryerjen e veprimeve të dhunshme, plagosje (rrahje).
