Vllaznia është në proces privatizimi dhe sponsori Alban Xhaferi është në garë për të marrë aksionet e klubit. Në Shkodër tanimë po mendojnë për rinovimet e lojtarëve, ndërsa disa nga yjet e skuadrës kanë oferta nga elita shqiptare dhe jashtë shtetit.
Pas sezonit të shkëlqyer dhe fitimit të Kupës së Shqipërisë, futbollistët kyç të Vllaznisë kanë kërkuar që me rinovimet e mundshme të shihet edhe pjesa e pagës. Disa prej tyre kërkojnë që të rishihen termat financiare, duke pësuar rritje.
Tanimë për rinovimin, lojtarët në Shkodër kërkojnë të ardhura më të mëdha, ndërsa suksesi i shkodranëve ka futur “në hall” ata që duhet të fusin dorën në xhep për të paguar rrogat e lojtarëve. Me një tjetër stof, Vllaznia e sezonit të ri kërkon të përforcojë skuadrën me elemente të tjerë, duke prezantuar deri në këto momente dy futbollistë.
