Maturantët janë rikthyer përpara godinës së Ministrisë së Arsimit, për të dytën ditë radhazi, për të protestuar kundër tezës së provimit të matematikës.
Kërkesat e tyre janë që të rishikohet pragu i pikëve të provimit, pasi sipas tyre provimi i matematikës ishte i një niveli tejet të vështirë.
Ditën e djeshme Qendra për Shërbimet e Arsimit, ka dalë në një deklaratë për mediat dhe ka thënë se provimi i maturës, për matematikën ka pasur pyetje të gjitha niveleve.
Maturantët pretendojnë ndryshe, duke thënë se provimi ka qenë i një niveli tepër të lartë dhe koha dy orë e gjysmë ka qenë e pamjaftueshme, për të realizuar testin.
Sipas maturantëve, pyetjet e provimit kanë qenë të përkthyera gabim, janë marrë në një shkollë në Kembrixh.
Maturantët kanë paralajmëruar se do të vazhdojnë protestat, nëse nuk marrin reagim.
