Belgjika e ka nisur me këmbën e mbarë, pasi mposhti me rezultatin 3-0 Rusinë në Shën Petersburg.
Romelo Lukaku ishte njeriu i sfidës me dy gola të shënuar, në fillim dhe në fund. Sulmuesi i Interit ealizoi që në minutën e 10-të dhe u ndihmua nga rusët, që e nxorën nga pozicioni jashtë loje duke i dhuruar asistin e golit që zhbllokoi sfidën.
Më pas ishte më e lehtë për Belgjikën, që shënoi edhe golin e dytë. Meunier me një goditje brenda zonës e çoi topin në rrjetë dhe deri në fundin e pjesës së parë nuk pati më gol.
Rusia mundohej ta hapte takimin, por me Belgjikën nuk ishte e lehtë. Topin e mbanin ata, por rastet e pastra të shënimit munguan. Llogaritë i mbylli Lukaku, i cili dy minuta nga fundi shënoi edhe golin e tretë, që e vendos Belgjikën në vendin e parë në grup, me pikë të barabarta me Finlandën që mundi Danimarkën.
