Do të shkrihet apo jo. Është kjo dilema më e madhe për Partizanin B. Zyrtarisht kanë rënë në Kategorinë e Dytë, por në klub po mendojnë që ekipi të mos ekzistojë më. Dhe kjo, për një motiv të qartë, pasi do t’i japin prioritet ekipit U21. Gjithsesi, vendimi nuk është marrë.
Do të jetë muaji korrik ai që do të shuajë çdo pikëpyetje. Është vetë Genc Tomori që e thotë këtë për “Panorama Sport”. Përgjegjësi i skuadrës B dhe njëherësh drejtor i akademisë, sqaron:
“Për momentin puna në klubin Partizani është përqendruar në ekipin e parë, që do të marrë pjesë në turet kualifikuese të Kupave të Europës. Më pas, besoj nga muaji korrik, drejtuesit do të ulen e të vendosin për vazhdimësinë e Partizanit B. Dilema është nëse do të vijojë puna për misionin që ka pasur kjo skuadër, furnizimin me lojtarë për ekipin e parë dhe anasjelltas. Ekziston edhe një dilemë tjetër për t’u zgjidhur.
Nëse klubi do të miratojë krijimin e U-21, atëherë Partizani B do të shkrihet. Nëse ndodh kjo, vëmendja do të përqendrohet te skuadra e U-21, e cila përveç lojtarëve që do të vijnë nga grup-moshat e akademisë Partizani, do të presë edhe elementë nga akademi e ekipe të tjera”.
