Liderja e opozitës bjelloruse Svyatlana Tsikhanouskaya, u ka thënë ligjvënësve amerikanë më 9 qershor se udhëheqësi autoritar Alyaksandr Lukashenka është duke kthyer Bjellorusinë në “Korenë Veriore të Evropës” dhe u ka bërë thirrje Shteteve të Bashkuara që të zgjerojnë sanksionet kundër personave dhe kompanive që financojnë regjimin e tij.
Tsikhanouskaya ka dëshmuar përmes video-lidhjes nga Praga në Komitetin e Senatit për Marrëdhënie me Jashtë, duke iu thënë anëtarëve të tij se vendimi i Lukashenkas për të devijuar aeroplanin e kompanisë Ryanair më 23 maj, në mënyrë që të arrestohet gazetari disident Raman Pratasevich, ka kaluar kufirin dhe e ka kthyer këtë gjë në kërcënim për paqen dhe sigurinë ndërkombëtare.
“Reagimi ndërkombëtar ka qenë i shpejtë dhe efektiv, duke vendosur masa praktike dhe duke nisur hetime nga ana e Organizatës së Kombeve të Bashkuara për Aviacionin Civil Ndërkombëtar”, ka thënë ajo.
Mirëpo ajo ka shtuar se reagimi ndërkombëtar nuk duhet të kufizohet vetëm në incidentin me aeroplanin e kompanisë Ryanair.
Situata në Bjellorusi, sipas saj, meriton përgjigje “kuptimplotë” nga Shtetet e Bashkuara dhe partnerët e tyre.
“Përndryshe, ne do të përballemi me situata të tillë në ardhmen, pasi Lukashenka është duke kthyer shtetin tim në Korenë Veriore të Evropës – jotransparent, të paparashikueshëm dhe të rrezikshëm”.
Shtetet e Bashkuara, partnerët në Evropë dhe shtetet tjera me mendësi të njëjtë kanë fuqi të “ndalin këtë trajektore”, ka thënë ajo, duke i kërkuar SHBA-së që të zgjerojë sanksionet për njerëzit që financojnë Lukashenkan.
Ajo u ka bërë thirrje vendeve perëndimore që të diskutojnë për krizën në Bjellorusi në profilet e nivelit të lartë, siç është Samiti i shtatë vendeve më të industrializuara, që do të mbahet në Britani, si dhe për organizim të konferencave të profilit të lartë për të diskutuar krizën në Bjellorusi.
Dëshmia e saj para senatorëve amerikanë ka ardhur para seancës së Parlamentit Evropian më 10 qershor, ku do të votohet për një rezolutë që dënon regjimin e Lukashenkas dhe veprimet e tij.
Bjellorusia është përfshirë në protesta prej kur Lukashenka, i cili është në pushtet nga viti 1994, është shpallur fitues i zgjedhjeve të mbajtura në gusht të vitit 2020.
Perëndimi dhe opozita bjelloruse besojnë se zgjedhjet janë manipuluar.
Prej atëherë, më shumë se 30,000 persona janë ndalur, qindra janë rrahur dhe torturuar.
