Jorida Tabaku, e cila mori mandatin e deputetes në zgjedhjet e 25 prillit, thotë se është e shqetësuar për cilësinë e debatit brenda PD dhe shton se sheh gjuhë përçarëse nga tre kandidatët me përjashtim të kryetarit aktual, Lulzim Basha.
Ajo thotë se vota e saj në Kryesinë e PD ka qenë për katër kandidatë përballë z. Basha, por ka abstenuar për emrat e kandidatëve.
Sipas saj cilësia e kësaj gare do të përcaktojë cilësinë e PD për katër vitet e ardhshme. Lidhur me pikëpyetjen nëse kandidatët nuk janë në një garë të barabartë përballë Bashës, Tabaku e mohoi një gjë të tillë.
“Kanë në dispozicion të gjitha strukturat e PD, kanë faqen në rrjetet sociale ku mund të bëjnë njoftime dhe degët e PD”, deklaroi ajo.
Anëtarja e Kryesisë së PD tregoi se një votuese i ishte ankuar për sulmet personale nga kandidatët brenda PD dhe shtoi se vetë ajo nuk po bën fushatë, por deklaroi hapur se mbështet kandidaturën e Lulzim Basha.
“Mbështes z. Basha dhe nuk kam asnjë kompleks dhe kufizim që ta them për një arsye të vetme. Nëse dëgjoj gjuhën e të gjithë kandidateve dhe shoh gjuhën përçarëse të tre kandidateve, shqetësohem për të ardhme e PD pas 13 qershorit. Secili prej tre kandidatëve flet unë dhe askush nuk flet për PD dhe këtë e dëgjoj vetëm tek z. Basha dhe besoj se pjesa më e madhe e anëtarësisë aty e sheh”, deklaroi Tabaku.
Ajo tha se do të kishte dashur një proces analize për zgjedhjet e 25 prillit, por data e afrimit të zgjedhjeve brenda PD u bë për shkak të sulmeve të disa individëve brenda partisë.
