Kryebashkiakët monistë, të dalë nga zgjedhjet lokale të 2019, marrin nën kontroll edhe shoqatën e Bashkive. Mbledhja e kryebashkiakëve të Rilindjes është zhvilluar në Lezhë dhe me një skenar të mirëmenduar, me synim anullimin e padisë në Gjykatën Kushtetuese të bërë nga Shoqata e Bashkive e drejtuar nga Voltana Ademi. Mbledhja e sotme ashtu sikundër pritej ka knkluduar me shkarkimin nga posti i kryetares së Shoqatave të Bashkive i Voltana Ademit, e cila është e vetmja demokrate në post lokal pas zgjedhjeve të 2019-tës.
Sipas Pjerin Ndreut, kryebashkiakut monist të Lezhës, ky vendim i sotëm është marrë për shkak se shoqata kishte dy vite që nuk funksiononte, dhe nuk ka asnjë lidhje me pretendimet e Ademit, e cila ka thënë se pas këtij veprimi fshihen interesat e socialistëve, për të tërhequr një padi për zgjedhjet e 2019 në Gjykatën Kushtetuese.
Voltana Ademi nga ana e saj e ka ngritur shqetësimin e shkarkimit nga posti i kryetares së shoqatës së bashkive vazhdimisht, ndërsa refuzoi që të ishte e pranishme në mbledhjen e sotme që u mbajt në Lezhë.
Kryetarja e Bashkisë së Shkodrës u ka shkruar dhe ambasadorëve në vendin tonë letër për veprimet e ndërmarra nga Ndreu dhe kryetarë të tjerë të bashkive socialiste.
Në emër të shoqatës së Bashkive ajo ka dorëzuar në Gjykatën Kushtetuese dhe për zgjedhjet e vitit 2019, të cilat u mbajtën për herë të parë në 30 vite pa opozitën.
