Detaje të reja raportohen lidhur me krimin e ndodhur mbrëmjen e djeshme në Shkodër, ku vëllai vrau motrën e tij.
Shefi i Komisariatit të Shkodrës, Paulin Çupi, ka konfirmuar se autori i dyshuar është Fabian Vukaj, i cili mendohet se ka qenë nën efektin e alkoolit kur ka kryer krimin.
Viktima Diana Vukaj, 58 vjeç, kishte tre ditë që kishte ardhur nga Gjermania. Ajo kishte humbur kontaktet me familjarët prej dy ditësh dhe këta të fundit e kishin denoncuar në polici. Pas marrjes së denoncimit, policia ka mbërritur në banesë dhe e ka gjetur të vdekur Diana Vukaj, ndërsa kanë bërë arrestimin e vëllait të saj si autor të dyshuar.
“Rreth orës 22:30 sonte në sallën operative është marrë një telefonatë që shtetasja Diana Vukaj ka dy ditë që ka humbur kontaktet me njerëzit e saj. Kemi organizuar shërbimet, verifikimi i parë është bërë në banesë ku është gjetur e pajetë. Menjëherë është ushtruar kontroll dhe në rrethinat pranë është kapur dhe ndaluar vëllai i saj Fabian Vukaj rreth 56 vjeç.
Ngjarja është e rëndë. Diana Vukaj është emigrante është kthyer nga Gjermania para tre ditësh. Vrasja është kryer me armë zjarri. Kufoma është gjetur në banesë në dhomën e gjumit të saj. Paraprakisht autori i dyshuar është në kushte depresione në gjendje të dehur,” deklaroi shefi i policisë.
Mësohet se vëlla e motër ishin të pa martuar.
