Nëpërmjet një ankandi, Liga Profesioniste e Futbollit bëri të ditur se është shitur emri i Kategorisë Superiore për tre sezonet e ardhshme, 2021–2022, 2022–2023 dhe 2023–2024. Siç bëhet e ditur në garë ishin dy shoqëri të interesuara dhe me ofertën më të mirë prej 54 mln lekësh të rinj, fitues u shpall Abissnet sh.a.
Më poshtë edhe njoftimi i plotë nga Liga Profesioniste e Futbollit:
“Ankandi për emrin e kampionatit të futbollit “Kategoria Superiore”
Sot më datë 03.06.2021, u zhvillua Ankandi për shitjen e emrit të kampionatit të futbollit “Kategoria Superiore”. Në Ankand u kualifikuan që të merrnin pjesë dy shoqëri, ajo “Banka OTP Albania sh.a.” dhe “Abissnet sh.a.” .
Vlera fillestare e Ankandit ishte 50 milionë Lekë. Në përfundim të tij, fitues u shpall shoqëria “Abissnet sh.a.” e cila e fitoi të drejtën e emrit të kampionatit të futbollit “Kategoria Superiore” për tre sezonet në vjim 2021–2022, 2022–2023 dhe 2023–2024 me vlerën 54 Milionë lekë”.
Kjo është hera e parë që Kategoria Superiore shet emrin me një vlerë të tillë dhe shuma sigurisht do të shkojë në arkat e klubeve të Superiores.
