Gjykata e Gjirokastrës ka lënë në qeli drejtuesin e punimeve të OSSH-së në Gjirokastër, pasi një elektricist i institucionit shtetëror humbi jetën në krye të detyrës.
Të Hënën, gjatë riparimit të një linje elektrike në lagjen Gërhot, dy elektriçistë janë dëmtuar pasi ranë në kontakt me energjinë elektrike. Një prej tyre humbi jetën më pas në spital.
Lidhur me ngjarjen, policia arrestoi Shkëlqim Onjenan, me detyrë drejtues i punimeve të grupit të ngritur nga OSSH Gjirokastër, për veprat penale “Shpërdorim i detyrës” dhe “Shkelja e rregullave të mbrojtjes në punë”. Ai u vu në pranga pasi sipas akuzës, nuk ka kryer kontroll dhe nuk ka monitoruar punën e elektricistëve.
Këtë të Enjte, gjykata e rrethit caktoi ndaj tij masën e arrestit me burg pa afat me kërkesë të prokurorisë.
Lidhur me ngjarjen, u procedua penalisht për veprën penale “Falsifikimi i dokumenteve” K.H., 64 vjeç, me detyrë operator i OSSHE Gjirokastër, pasi dyshohet se ka falsifikuar dokumente duke ndërhyrë në librin e dispeçerisë së OSSH Gjirokastër.
