I ftuar në emisionin “Sport News” të moderatores Daljana Sejdia në Neës24, trajneri Julian Ahmataj është shprehur se Teuta e fitoi titullin, për shkak të përgatitjes së mirë fizike. Në fjalët e tij, Ahmataj shtoi se Partizani dhe Laçi nuk ia dolën të fitojnë titullin, për shkak të mungesës së zëvendësuesve.
“Teuta e ruajti skuadrën dhe u forcua me lojtarë si Bregu, që e përforcoi më shumë ekipin. Tirana gjithmonë është pretendente, por pas largimit të disa lojtarëve dhe prishjes së strukturës në skuadër, e çuan ekipin që të çalonte në dy fazat e para. Humbi Kalenë dhe Torasën në ndeshjet deçizive dhe çeduan në fundin e kampionatit. E njëjta gjë i ndodhi edhe Partizanit në fund. E njëjta gjë i ndodhi si Partizanit, ashtu edhe Tiranës me Laçin.
Kjo ndodhi për shkak të mungesave në stolin e rezervave për të zëvendësuar lojtarët. Te Teuta është një punë kolosale. Eduard Salillari, përgatitësi atletik, për të cilin askush nuk flet, por të gjithë e dinë meritën e tij. Kjo është një punë e mirë e bërë nga stafi i klubit, që nuk kishte mungesa. Teuta e meritoi sepse në nisje ishte skuadra më e kuotuar.
Kjo është një analizë e bazuar në fakte. Asnjë skuadër nuk është e strukturuar në nivelin maksimal për të dalë kampion. Nuk kanë konkurrencë brenda skuadrës. Skuadra që shkon për kampione, duhet t’i ketë të gjitha rolet e dubluara. Teuta ishte disi më mirë në këtë drejtim dhe dolën kampion. Skuadrat e tjera, në zëvendësimet që bënin dhe në ndeshje, ishin dobët.
Krasniqi ka bërë një punë të mirë, por Teutës i mungonte një sulmues që të shënonte shumë gola. U bë Bregu pika kryesore për golat e shënuar. Nëse nuk e bënte edhe Bregu këtë detyrë, atëherë Teuta mund të mos e fitonte titullin”, tha Ahmataj.
