Është mbyllur finalja e madhe e UEFA Champions League mes Man.City-t dhe Chelseat, me “Blutë” e Londrës që kanë triumfuar me rezultatin 0-1 falë një goli të Kai Havertz në minutën e 42-të.
Blerja më e shtrenjtë e verës së shkuar për londinezët, finalizoi me sukses një kundërsulm të Chelsea-t, duke marrë mrekullisht një vertikalizim dhe kaluar portierin Ederson.
Supersfida e mbrëmjes së sotme, pati tension, raste të pastra shënimi për të dyja skuadrat, luftë e fortë sportive gjatë gjithë 90 minutave, ndërsa pas përfundimit të takimit, nuk mund të mungonin dy skenarët: Festë e çmendur e skuadrës së Tuchel dhe lot të “Qytetarëve” të drejtuar nga Pep Guardiola.
Chelsea shpallet kështu për herë të dytë në histori kampion Europe, pas suksesit në sezonin 2011-12. Një sukses i madh për trajnerin gjerman, Tuchel, i cili pas finales zhgënjyese të sezonit të kaluar kur drejtonte PSG-në, teksa humbiste ndaj Bayern Munich tashmë ia del të sigurojë trofeun me “veshë të gjatë” për herë të parë në karrierë.
Nga ana tjetër, Pep Guardiola nuk ia del të fitojë Champions-in e tretë prsonal pas atyre në 2009 dhe 2011 me Barcelonën. Tekniku spanjoll ka fituar gjithçka duke përjashtuar Champions me klubin anglez gjatë qëndrimit të tij 5-vjeçar në ishull ndërsa tashmë pritet të rivlerësojë të ardhmen e tij me “Qytetarët”.
