Në konferencën e sotme zhvilluar në Kryeministri, ministri gjerman për Europën, Michael Roth, tha se Bashkimi Europian duhet të mbajë premtimet e bëra për Ballkanin Perëndimor.
Roth tha se në Bashkimin Europian nuk diskutohet si treg i brendshëm, por si sistem vlerash, duke shtuar se kushtet për një shtet ligjor, apo kërkesat për të luftuar korrupsionin dhe krimin e organizuar nuk janë për Brukselin, por reforma që i shërbejnë vendit.
“Bashkimi Europian duhet të mbajë premtimet e veta. Për shembull liberalizimi i vizave me Kosoven duhet të ishte përmbushur prej kohësh sepse ka prezantuar që kushtet janë përmbushur. BE është strukturuar në çështje qendrore mbi arritjen e konsensusit.
Në fund duhet që të gjitha shtetet e BE-së të mbajnë përgjegjësitë e tyre. Unë jam i detyruar të jem racional sepse jam i bindur që me argumente të mira mund të kapërcehet edhe skepticizmi dhe ky është një proces ku të gjithë duhet të mbajnë përgjegjësitë e tyre.
Theksoj faktin që kërkesat për liri të mediave, luftë kundër korrupsionit dhe krimit të organizuar nuk bëhen për Brukselin, por reformat janë në shërbim të vendit tuaj. Për këtë ne diskutojmë rreth BE-së jo si treg i brendshëm, por si sistem vlerash.
Ne kemi ndërfutur mekaznizmin e dialogut për shtetin ligjor, apo që shtetet anëtarë të mos marrin më fonde nëse nuk përmbushin detyrimet. Por dua te them sot se është arritur shumëçka dhe kjo duhet të vlerësohet”, tha Roth, duke shtuar se “pandemia na ka ndryshuar të gjithëve. Është një krizë që na ka ndikuar të gjithëve dhe praninë e gjithsecilit prej nesh e bën reciprokisht të nevojshme. Sigurisht gjërat mund të na shkojnë mirë nëse edhe fqinjëve tanë u shkojnë gjërat mirë”.
“Gjendja në vendet e Ballkanit Perëndimor është e ndryshme, pra jo e njëjtë për të gjitha vendet. Në Shqipëri sikundër edhe në RMV klima e rrugëtimit të këtyre vendeve është më pozitive, po ashtu edhe sa i përket pandemisë.
Pra për momentin unë konstatoj vetëm një problem që nuk ka të bëjë me Shqipërisë, por një problem bilaterale mes Bullgarisë dhe Maqedonisë së Veriut dhe për këtë arsye unë kam qenë atje për të parë se si mund të eliminohet një konflikt i tillë”, tha ai.
