Rron Broja dhe Jasir Asani kanë qenë lojtarët më të mirë të Partizanit këtë sezon futbollistik dhe jo më kot, ka ekipe të interesuara për ta. Skuadrat që donin shërbimet e Brojës dhe Asanit, nuk munguan as në janar, por dyshja vendosi që t’i shkojë deri në fund sezonit aktual me fanellën e kuqe.
Ashtu siç raporton “Panoramasport” për Brojën, ka ofertë konkrete nga Mezokovesdi ekip që militon në elitën e futbollit hungarez. Oferta që ka ardhur për Brojën është me pagë 8 mijë euro në muaj. Vetë ai preferon të qëndrojë edhe sezonin e ardhshëm te Partizani dhe po pret fillimisht nëse do të gjejë akord me drejtuesit e kuq sa u takon kushteve financiare, më pas për të vendosur përfundimisht.
Sa i takon Jasir Asanit, situata është edhe më e komplikuar, pasi mesfushorin anësor e duan plot tri ekipe. Një ekip nga Suedia, një nga Turqia dhe një nga Rusia, kanë shfaqur interes për Jasirin dhe kanë biseduar edhe me agjentin e lojtarit.
Asani në dalje publike, konfirmoi se brenda 10 ditësh, do të vendosë për të ardhmen e tij, si dhe ia ka bërë të qarta kushtet financiare Partizanit për të rinovuar. Si Rron Broja, ashtu dhe Jasir Asani, janë lojtarë të rëndësishëm për Partizanin dhe trajneri Ilir Daja do t’i donte në skuadër.
