Për shkak të banesës së vogël, kosovares Leona D. i është mohuar leja e qëndrimit në Austri. Ndonëse e martuar me austriak më të cilën ka edhe një vajzë, ajo mund të dëbohet nga Austria për në Kosovë, njofton albinfo.at
Leona D. (Emrat janë të ndryshuar) nuk mund të pajtohet më atë që i ka ndodhur. Prej gjashtë vjetësh ajo është e martuar me Max D. nga Vjena. Tre vjet më parë çifti solli në jetë vajzën Emma. “Emma shkon në çerdhe këtu, flet perfekt gjermanisht. Edhe unë kam njohur shumë miq dhe kam gjetur punë. Pjesën e mbetur të jetës sime do të dëshiroja ta kaloja në Austri”, tha për heute.at kosovarja 23-vjeçare.
Por jo gjithçka po shkon si duhet. Gjykata Administrative në Vjenë ia ka mohuar Leonës lejen e qëndrimit. Arsyeja duket e çuditshme, transmeton albinfo.at. “Ne jetojmë në një banesë, e cila i përket vjehrrit tim. Ai më shumë dëshirë na ka dhënë banesën në dispozicion. Banesa është 73,88 metra katrorë, por duket të jetë e vogël, po ashtu bashkëshorti im ka rrogë të vogël dhe fiton shumë pak”, ka shtuar Leona.
Si drejtues (shofer) i makinerive të ndërtimit, 25-vjeçari Max D. merr 1.800 euro rrogë neto (14 herë në vit). Babai i tij u ka dhënë atyre të drejtën për të jetuar në atë banesë. “Vendimi sipas të drejtës ligjore është i pakuptimshëm”, thotë avokati i njohur shqiptar në Vjenë, Mirsad Musliu, i cili është përfaqësues dhe mbrojtës i të drejtave të kësaj familjeje. “Në këtë rast, i bie de facto që austriakët të dëbohen nga Austria, kjo nuk mund të ndodhë”, thotë ai. Juristi shqiptar vazhdon tutje: “Meqenëse fëmija është një shtetase austriake, nëna nuk mund të dëbohet, që do të thotë se vajza, e cila është e lidhur ngushtë me nënën, gjithashtu do të duhej të largohej nga Austria”.
Sipas avokatit Musliu, atëherë edhe Max D. i cili ka një marrëdhënie të ngushtë me bashkëshorten e tij, nëse dëshiron të vazhdojë jetën me bashkëshorten dhe vajzën e tij, po u dashka të shpërngulet për të jetuar në Kosovë. Dhe kjo është e papranueshme.
Në anën tjetër, artikulli i postuar në faqen e Facebook-ut të portalit heute.at, ka marrë komente të shumta, përcjell albinfo.at. Shumica e komentuesve deklarohen të habitur me këtë vendim. Por siç shkruajnë ata, banesa prej 73 metrave katrorë dhe të ardhurat prej 1.800 euro neto, janë të mjaftueshme për një familje treanëtarëshe. Edhe pse shumica ndiejnë keqardhje për rastin, ata shkruajnë se mund të jenë arsye të tjera shtesë që kanë bërë që autoritetet austriake të marrin këtë vendim.
