Mbyllet pas 120 minutave dhe goditjeve të 11-metërshave, finalja e Europa League mes Villareal dhe Man.United. Të dyja ekipet kërkonin me ngulm trofeun e lakmuar, por ajo që e arriti ishte ekipi spanjoll i drejtuar nga Unai Emery.
Koha e rregullt përfundoi në barazim 1-1. Fillimisht ishin spanjollët që kaluan në avantazh, pas golit të shënuar nga Gerard Moreno në minutën e 29-të. Pjesa e parë përfundoi me këtë rezultat, ndërsa në të dytën Edison Cavani shënoi për “Djajtë e kuq” në minutën e 55-të, duke vendosur baraspeshën.
Në përfundim të 90 minutave, ndeshja shkoi në shtesë. Pavarësisht kësaj, ekipet nuk kanë mundur përsëri të shënojnë gol, ku më pas iu drejtuan penalltive.
Tek penalltitë skuadra e Villarreal u tregua më e saktë, duke fituar trofeun pas një serie të gjatë tentativash ku në total u gjuajtën 21 penallti. Ai që gaboi penalltinë e vetme të mbrëmjes ishte portieri “Djajve”, David De Gea.
Me këtë sukses, Unai Emery është bërë trajneri më i suksesshëm i këtij kompeticioni me katër trofe, duke lënë mbrapa legjendën Giovanni Trappatoni me 3 trofe.
