Teuta është shpallur kampione e Kategorisë Superiore për sezonin 2020/2021. Skuadra e drejtuar nga Edi Martini, triumfoi 6-1 në ndeshjen e fundit ndaj Apolonisë duke siguruar titullin e dytë kampion në historinë e klubit.
Një ndeshje e dominuar plotësisht nga Teuta, të cilët shënuan dy gola të shpejtë gjatë pjesës së parë me anë të Dejvi Bregut 16’ dhe Lorenco Vilës 27’. Për miqtë shkurtoi diferencat Redon Mihana në minutën e 34-t.
2-1 do të mbylleshin 45 minutat e para, teksa me rifillimin e lojës durrsakët do të vendosnin diktatin e tyre. Skenën do ta merrte Dejvi Bregu, i cili arriti tripletën personale me golat në minutat 50’ dhe 65’, teksa Apolonia luante me 9-të lojtarë pas daljes me të kuqe të Repajt dhe Sotës përkatësisht në minutat 53’ dhe 64’.
Duke shfrytëzuar hapësirat e shumta, Teuta do të realizonte edhe dy herë të tjera me anë të kapitenit Renato Arapi dhe Plakut për të vulosur shifrat e përgjithshme në 6-1.
Teuta e mbyll sezonin në kuotën e 66 pikëve, po aq sa edhe Vllaznia por që shpallen kampionë falë golaverazhit më të mirë.
Në ndeshjet e tjera, Vllaznia mposhti 2-0 Laçin falë golave të Herald Markut nga pika e bardhë e penalltisë dhe Haris Dilaver në pjesën e dytë.
Kastrioti ia doli të fitojë 1-2 Kukësin dhe tani do të përballet me Tomorin në finalen e “play-off”. Devid dhe Daci realizuan golat e fitores për ekipin krutan. Bylisi i bashkohet Apolonisë në Kategorinë e Parë.
Skuadra ballshiote doli pa pikë nga takimi shtëpiak me Partizanin. “Demat” e Ilir Dajës fituan 2-4 falë golave të Carës, Cardosos, Selitës dhe Malës. Sfida tjetër, Tirana-Skënderbeu përfundoi 3-1 për ekipin kryeqytetas. Taulant Seferi shënoi dy gola për vendasit.
