Një minator raportohet se ka mbetur i plagosur nga një shpërthim i ndodhur këtë të Hënë në një nga minierat në Bulqizë.
36-vjeçari i identifikuar si Valter Durici, ka marrë plagë të shumta në qafë dhe gjoks si pasojë e shpërthimit dhe është transportuar drejt Tiranës për të marrë mjekim të specializuar, për shkak të gjendjes së rënduar shëndetësore.
Nuk dihen ende rrethanat e kësaj ngjarje të rëndë, ndërkohë që gjendja e të plagosurit paraqitet serioze. Shpërthimi ka ndodhur në një prej galerive të minierës, dhe Durici është plagosur si pasojë e gurëve që e kanë zënë në pjesë të ndryshme të trupit.
Policia ka shkuar në vendngjarje dhe po heton për shkaqet, si dhe kushtet e sigurisë në punë, që në jo pak raste lënë shumë për të dëshiruar.
“Rreth orës 12.00, në një subjekt minerar në Bulqizë, dyshohet se gjatë punës është aksidentuar shtetasi V.D., i cili është transportuar drejt Tiranës për ndihmë mjekësore më të specializuar. Grupi hetimor ndodhet në vendin e ngjarjes dhe vijon hetimi për zbardhjen e plotë shkaqeve ngjarjes”, njoftoi policia, pa dhënë asnjë detaj më tepër për ngjarjen.
