Policia e Korçës ka bërë arrestimin e dy shtetasve, pasi u konfliktuan me pronarin e një lokali.
Sipas njoftimit të policisë, në pranga kanë rënë shtetasit Luçiano Xhialli, 19 vjeç, banues në fshatin Moravë dhe Klajdi Latka, 16 vjeç, banues në Korçë.
Policia ka sekuestruar një pistoletë me municion luftarak.
Këta shtetas janë konfliktuar për motive të dobëta me shtetasin M. F. dhe gjatë konfliktit shtetasi Klajdi Latka dyshohet se ka qëlluar me armë zjarri në drejtim të lokalit të shtetasit M. F., pa shkaktuar dëme në njerëz dhe më pas është larguar nga vendngjarja, informon policia.
Forcat e Policisë, pasi ndaluan dy të rinjtë e lartpërmendur, kanë ushtruar kontroll në afërsi të vendit ku kishte ndodhur konflikti dhe si rezultat gjetën e sekuestruan në cilësinë e provës materiale një armë zjarri tip pistoletë me municion luftarak, të cilat dyshohet se i përkasin shtetasit K. L.
Materialet në ngarkim të tyre i kaluan Prokurorisë Korçë, për veprime të mëtejshme hetimore.
