Minoreni i arrestuar pas vrasjes së ndodhur javën e kaluar në Shkodër ku u ekzekutua me shtatë plumba Endri Mustafa, rezulton një njohës i mirë i armëve të zjarrit. 15-vjeçari i cilësuar si dëshmitari kryesor që çoi në shpalljen e Ibrahim Licit në kërkim, shfaqet në rrjetet sociale me disa pamje dramatike teksa qëllon me armë zjarri në zonën e Livadeve i pa shqetësuar nga askush. Pamjet në fjalë duket se tregojnë situatën e rëndë të kriminalitetit në Shkodër që nuk kursen as të miturit.
Këto janë pamjet filmike të publikuara në rrjetet sociale (shiko videon) ku shfaqet 15-vjeçari me iniciale E. M, i arrestuar, lidhur me vrasjen e Endri Mustafës më 16 Maj 2021, në zonën e Livades në Shkodër.
Minoreni ndodhet në zonën e Livades në Kiras, pikërisht në të njëjtin vend, ku është gjendur i pajetë babai i tre fëmijeve, Mustafa.
Pamjet filmike tregojnë një realitet dramatik në situatën ku ndodhet Shkodra, pasi fëmija 15-vjeçar mban armën dhe e përdor atë, njësoj si forcat ushtarake.
Edhe pse cilësohet si dëshmitari kryesor u vrasjes së Endri Mustafës, i cili ka akuzuar Ibrahim Licin si autor të krimit, policia dhe prokuroria e Shkodrës, nuk e kanë përjashtuar të miturin nga dyshimet se ai mund të jetë personi që ka qëlluar Endri Mustafën.
Në këto video, të cilat janë publikuar nga vetë adoleshenti në rrjetin social “Instagram”, tregohen njohuritë e tij mbi armët.
Ai shfaqet buzë liqenit të Shkodrës në Livade dhe pamjet tregojnë qartazi se çfarë është në gjëndje të bëjë ky i mitur nëse ka një armë në dorë.
Ndërsa në këtë fotografi, minoreni shfaqet kur ka qenë në moshën 12-vjeçare dhe në dorë mban një automatik AK-47, të larë me ngjyrë floriri.
15-vjeçari tashmë është një nga dy persona të arrestuar për vrasjen e Endri Mustafës.
Sipas hetimeve, 15 vjeçari është njeriu që ka nxjerrë nga shtëpia dhe e ka çuar në Livade, Endri Mustafën, duke e joshur këtë të fundit me faktin se kishte mbjellë një gastër tokë me 150 rrënjë kanabis.
Pas ngjarjes fëmija ka çuar policinë kriminale, pikërisht në vendin ku ishte fshehur prapa një ferre, trupi i pajetë i Endri Mustafës.
Për këtë vrasje është shpallur në kërkim, Ibrahim Lici, ndërsa janë vënë në pranga edhe Edison Arrazi dhe i mituri.
Viktima e vrasjes është qëlluar me 7 plumba, ku 6 i kanë prekur organet jetësore dhe një plumb e ka pasur në gojë.
Endri Mustafa, ishte larguar nga banesa mbrëmjen e 15 majit 2021, rreth orës 22:00 por 24 orë më pas bashkëshortja e tij Ingrid Mustafa, ka bërë kallëzim në polici se 32-vjeçari ishte zhdukur.
Gruaja ka treguar dhe bisedën e fundit që Endri, kishte bërë me nënën e tij dhe kjo e fundit e kishte paralajmëruar të mos merrej me 15- vjeçarin, duke i kujtuar një bisedë të vjetër që para një viti, ai kishte treguar se kishte marrë 3 mijë euro për të nxjerrë në pritë dikë tjetër në Shkodër. /Ora News
