Greqia mban të mbyllur kufijtë për udhëtarët e turistët shqiptarë. Qeveria greke ka vendosur të shtyjë deri më 31 maj 2021 masat kufizuese që janë në fuqi për qytetarët që udhëtojnë nga Shqipëria drejt vendit fqinj.
Pika e vetme kufitare me Greqinë që do të vijojë të jetë e hapur është ajo e Kakavijës, e cila do të punojë nga ora 07.00 deri më 19.00.
Në këtë fashë orari do të lejohen deri në 400 persona në ditë, të cilët kanë leje qëndrimi ose nënshtetësi greke.
Ndërkohë pika kufitare e Kapshticës do të jetë e hapur vetëm për punëtorët sezonalë, nga ora 08.00 deri në orën 16.00, vetëm 400 persona në ditë.
Greqia hapi të shtunën pranimet e punëtorëve sezonal, të cilëve u la afat deri më 31 maj për të kaluar kufirin në mënyrë të rregullt.
