Përfaqësuesja U21 e Kosovës ka publikuar listën e futbollistëve të përzgjedhur për grumbullimin e parë të edicionit. “Dardanët” luajnë në qershor ndeshjen e parë të kualifikueseve të Europianit të kësaj grupmoshe ndaj Andorrës, ndërsa janë përsëri në të njëjtin grup me Shqipërinë, për të dytin edicion radhazi.
Trajneri Majlkëll Nes, i cili ka marrë vendin e Rafet Prekazit pasi ky i fundit u shkarkua pas dështimit në sezonin e kaluar, ka bërë një listë të parë me 32 futbollistë, të cilët do të marrin pjesë në një minikamp stërvitor që nis më 25 maj. Deri më datë 29 maj ai do të shohë në veprim lojtarët për të reduktuar më pas listën në 24 emrat të cilët do të vijojnë përgatitjet për ndeshjen ndaj Andorrës e cila luhet më 8 qershor.
Në listën e Nes bie në sy prania e lojtarëve nga e gjithë Europa, por njëkohësisht edhe e emrave nga klubet e Kategorisë Superiore. Të ftuar këtë radhë janë Leart Sadriu i Skënderbeut, si dhe Loti Celina i Partizanit, të dy mbrojtës të cilët pritet të bëhen pjesë e grupit që do të marrë pjesë në ndeshjet eliminatore.
