Falë humbjes kontroverse të Partizanit ndaj Vllaznisë, Teuta është pranë titullit kampion. Sfida në kryeqytet u vendos nga një 11-metërsh i dyshimtë i akorduar nga arbitri i sfidës, Enea Jorgji.
Për këtë episod, ka folur edhe kapiteni i Teutës, Renato Arapi. I ftuar në emisionin “Zona Gol”, ai u shpreh:
Ishte penallti apo jo në Partizani-Vllaznia? “Në momentin e parë duket që dora është ngjitur dhe nuk është penallti, por kur e shikon nga pozicioni tjetër duket pak dora e hapur dhe është penallti.
Për këto dy sezone që kam te Teuta është hera e parë që presidenti bashkohet me ne për festë. Është një nga kampionatet më të forta, por jo më cilësoret e kjo e ka bërë më të bukur kampionatin. Nuk kemi gabuar vetëm ne, por edhe skuadrat e tjera e kjo na i ka bërë më të lehtë për vendin e parë. Partizani është skuadra e vetme që na ka mundur, kurse me pjesën tjetër kemi qenë të barabarta. Të gjithë e kuptojnë që arma jonë më e fortë ka qenë mbrojtja që nuk kemi pësuar gola”.
