Të mërkurën mbyllet edicioni i Kategorisë Superiore, në të cilën ende nuk janë dhënë verdiktet e fundit dhe presim fërshëllimat përfundimtare të gjithë kësaj ecurie për të mësuar kampionen dhe të rënët në të Parën.
Nëse dy javë përpara fundit të kampionatit, Partizani kuotohej favorit për titullin, sidomos me fitoren e bujshme në Durrës, java e 35 e Superiores ka përmbysur gjithçka.
Fitorja e Vllaznisë përballë të kuqve, e ka zbritur skuadrën e Ilir Dajës në shkallën e tretë, një pikë më pak se vendi i parë që ndahet mes shkodranëve dhe Teutës. Partizani në ndeshjen e fundit luan me Bylisin e vendit të nëntë, që lufton për mbijetesë me Kastriotin dhe nuk do të jetë aspak e lehtë për të siguruar pikët e plota.
Kësisoj skuadra e parë favorite për tu shpallur kampion është Teuta që pret në shtëpi Apoloninë e vendit të fundit, fierakët të cilët nuk kanë më pretendime veçse prestigjit. Nëse bregdetarët bëjnë detyrën, atëherë janë kampion.
Por ekziston një skenar që i heq titullin nga duart durrsakëve. Vllaznia duhet të mposht Laçin në ndeshjen e fundit dhe shënojë një gol më shumë sesa Teuta në ndeshjen me Apoloninë. Në këtë rast shkodranët do të rrëmbenin titullin pasi do të kishin golavarazh më të mirë sesa skuadra e Edi Martinit.
Laçit të vendit të katërt ndërkohë i mbetet skenari më i pamundur. Kurbinasit duhet të fitojnë përballë Vllaznisë dhe të shpresojnë te humbja e Teutës kundër Apolonisë dhe Partizanit kundër Bylis.
Ethet janë të forta edhe për mbijetesën. Pikërisht Bylisit i nevojitet fitorja me Partizanin për të parakaluar Kastriotin që ka një pikë më shumë në vendin e tetë. Krutanët në letër janë favoritët për të qëndruar në Superiore pasi do të përballen me Kukësin, skuadër që sikurse Tirana janë jashtë objektivave për këtë sezon.
