Partizani u mposht ditën e djeshme nga Vllaznia minimalisht në “Air Albania”, duke dalë kështu nga gara për titull. Ndeshja e djeshme ka krijuar polemika të shumta, të cilat lidhen me penalltinë e akorduar për shkodranët, për prekje me dorë.
Akuzat ndaj arbitrit Enea Jorgji kanë qenë të shumta, teksa këtë herë ka qenë lojtari kryesor i Partizanit për këtë sezon, Jasir Asani, i cili ka reaguar ashpër për atë që ndodhi në ndeshjen e djeshme, duke thënë se një ordiner nuk mund të tallet me djersën e një skuadre.
“Edhe nëse nuk e merituam të fitonim sipas disa “speclistëve”, edhe nëse nuk bëmë ndeshjen më të mirë të sezonit, ju kurrë nuk mund të talleni me djersën tonë. Nuk mund të vijë lloj-lloj ordineri të prishë ndeshjen dhe të prishë ëndrrën tonë!”, shkruan Asani në profilin e tij.
Kujtojmë se Asani ishte mungesa e madhe e Partizanit ndaj Vllaznisë, për shkak se kishte plotësuar numrin e kartonëve.
