Dy zyrtarë të bashkisë Himarë janë arrestuar për shpërdorim detyre.
Policia njoftoi këtë të Shtunë se, efektivët për Hetimin e Krimit Ekonomik e Financiar në Vlorë arrestuan dy persona ndaj të cilëve gjykata e rrethit ka vendosur masën e arrestit me burg.
Në pranga u vunë:
- R. H., 35 vjeç, banues në Himarë, me detyrë kryeinspektor pranë Inspektoratit të Mbrojtjes së Territorit të Bashkisë Himarë;
- E. Z., 30 vjeç, banues në Himarë, me detyrë inspektor pranë Inspektoratit të Mbrojtjes së Territorit të Bashkisë Himarë.
Po ashtu, u bë shpallja në kërkim e: M.N., 36 vjeç banues në Sarandë dhe Dh. B., 53 vjeç, banues në Himarë, të dy me detyrë inspektor pranë Inspektoratit të Mbrojtjes së Territorit të Bashkisë Himarë.
“Prokuroria e Rrethit Gjyqësor Vlorë ka urdhëruar ndalimin e këtyre shtetasve, në bazë të vendimeve të Gjykatës, pasi nga hetimet e kryera ka rezultuar se në bashkëpunim me njëri-tjetrin kanë shpërdoruar detyrën, duke lejuar ndërtimin e paligjshëm të disa objekteve në territorin e Bashkisë Himarë. Materialet në ngarkim të tyre i kaluan Prokurorisë pranë Gjykatës së Shkallës së Parë Vlorë, për veprën penale ‘Shpërdorimi i detyrës’”, njoftoi policia.
