Nënkryetari i LSI, Petrit Vasili, ka reaguar përmes një postimi në rrjetet sociale, lidhur me zhvillimet më të fundit, ku DASH shpalli person “non grata” ish-Kryeministrin Sali Berisha dhe familjen e afërt të tij.
Vasili shkruan se sovraniteti dhe dinjiteti, janë dimensione që nuk falen kurrë.
“Sovraniteti dhe dinjiteti nuk janë gjendur kurrë më parë nën një sulm kaq të egër në Shqipëri.
Gjithfare duarsh të brendshme e të jashtme antishqiptare janë vërsulur mbi këto dy dimensione, që kanë mbajtur dhe mbajnë gjallë Shqipërinë dhe shqiptarët në qindra vjet.
Jashtë tyre Shqipëria është thjesht asgjë.
Nëpërkëmbja, përdhosja dhe vënia poshtë këmbëve e dinjitetit për ta zëvendësuar me nështrimin poshtërues, të bindur, pa gojë e pa veprim, ky është synimi i vetëm i rilindjes dhe i të gjithë aksesorëve të saj vendas apo të huaj.
Realizimi i kësaj përmes strategjisë që: thashethemi shndërrohet në fakt për kundërshtarët dhe fakti shndërrohet në thashethem për veten, kjo është një nga rrugët për të goditur e asgjësuar dinjitetin”, shkruan Vasili.
Sipas tij, trysnimi i egër, asfiksues propagandistik i dinjitetit përmes medias së kapur ka synim të vetëm mbylljen e gojës dhe fshehjen e se vërtetës dhe rrënimin e cdo norme morale, që shërben si një gardian i fortë i brendeshëm i gjithsecilit për të mos shkarë në veprime që demtojne shumë rëndë komunitetin dhe vendin.
