Gjykata e Prishtinës ka caktuar masën e paraburgimit prej 30 ditë, për shtatë të dyshuar si të përfshirë në trafikun e 400 kg kokainë që u sekuestruan të Hënën në Lipjan.
Masa e paraburgimit e cila u kërkua nga Prokuroria u caktua për të dyshuarit: Izet Sheqiri, Kadri Sheqiri, Kadri Ibrahimi, Fehmi Bytyqi, Faton Vrajolli, Enver Belegu dhe Bajram Maliqi.
Avokati i të akuzuarve tha se Prokuroria e Kosovës nuk ka asnjë provë që i lidh shtatë të arrestuarit me sasinë e drogës që u sekuestruan të hënën në Lipjan.
Të dyshuarit për këtë rast akuzohen se kanë kryer veprat penale: pjesëmarrja dhe organizimi i grupit kriminal, blerje, posedimi, shpërndarja dhe shitja e paautorizuar e narkotikëve, si dhe armëmbajtje pa leje.
Sasia e drogës dyshohet se u nis nga Brazili dhe kaloi tranzit në Portin e Durrësit, para se të sekuestrohej në Lipjan.
