Pas më tepër se një vit e gjysmë nga krimi në Isola Rizza, më 28 nëntor 2019 në rrugën Corte Casalino, grupi hetimor i karabinierëve të Veronës më në fund ka identifikuar autorin e dyshuar, i cili shtiu me pistoletë kundër Ervin Karafilit, shqiptar 34-vjeçar, me precedentë penalë, i mbetur i vdekur në vend.
Në bashkëpunim me policinë holandeze, karabinierët kanë gjurmuar e arrestuar shqiptarin Mirion Nuredini, 40 vjeç, me precedentë, rezident në Novellara, prej nga u largua menjëherë pas vrasjes, fillimisht në Shqipëri e më pas në Gjermani, për t’u vendosur përfundimisht në qytetin holandez Ter Apel. Aty u prangos në zbatim të mandat-arrestit evropian me akuzën e vrasjes me dashje dhe mbajtjes së paligjshme të armëve, lëshuar nga gjykata e Veronës.
Në të njëjtën ditë është arrestuar edhe një tjetër shqiptar, Albert Xibraku, 43 vjeç, rezident në Marmirolo, me akuzën e vrasjes së mbetur në tentativë dhe mbajtje të paligjshme armësh. Ai tentoi të vriste Nuredinin me një pistoletë që ia kishte dhënë Ervin Karafili.
Sipas hetuesve, atë ditë ndodhi një sherr midis Karafilit e Xibrakut nga njëra anë dhe Nuredinit nga tjetra, për shitjen e drogës. Karafili e Xibraku, me armët në duar, u konfrontuan me Nuredinin, i cili, gjithashtu i armatosur, shtiu e vraru Karafilin, ndërsa Xibraku iu përgjigj, por pa e goditur.
Tani, Xibraku ndodhet në burgun e Mantovës, ndërsa Nuredini është në pritje të ekstradimit nga Holanda në Itali në ditët e ardhshme.
