Një dosje e çelur vitin e kaluar për akuzat “Marrëdhënie seksuale me dhunë me të rritura” dhe “Përndjekje”, është pushuar së fundmi nga Gjykata e Beratit.
Sipas vendimit të siguruar nga BoldNews, gjyqtarja Klejda Çapja ka pranuar kërkesën e prokurores Albjona Papaja për pushimin e hetimeve ndaj të akuzuarit A.B.. Sipas prokurorisë dhe gjykatës, nuk ka prova që të provojnë fajësinë e të akuzuarit.
Ndërkohë, në dëshminë e saj, denoncuesja, e martuar në kohën kur dyshohet se janë kryer faktet e pretenduara dhe me fëmijë, është shprehur se i akuzuari e ka kërcënuar me publikimin e disa bisedave intime dhe në këtë mënyrë ka kryer marrëdhënie seksuale me të.
Bashkëshorti i denoncues po ashtu deklaron se e ka mësuar lidhjen jashtëmartesore e më pas ka kërkuar divorcin.
Edhe një nga fëmijët e çiftit thotë se “e njeh shtetasin A.B. (të akuzuarin), duke mos dhënë shpjegime të tjera”, sqarohet në vendimin e gjykatës.
Nga ana tjetër, i akuzuari thotë se nuk ka kryer marrëdhënie intime me denoncuesen dhe nuk e ka kërcënuar. Madje shton se ka qenë ajo e cila i ka telefonuar dhe dërguar SMS.
Dëshmia e denoncueses
Sipas dosjes gjyqësore, rezulton se: Më datë 06.04.2020, ora 16.00, pranë zyrës së SHÇBA-së Berat, është paraqitur dhe ka bërë kallëzim penal shtetasja O.Sh. Ajo ka deklaruar se ka 10 vite e martuar me shtetasin F.Sh., me të cilin ka dy fëmijë. Rreth katër vite më parë, ajo është njohur me shtetasin A.B., ku fillimisht kanë shkëmbyer mesazhe erotike, dhe kjo gjendje ka zgjatur rreth një vit. Pas një viti, ajo ka ndryshuar numrin e telefonit për t’iu shmangur shtetasit A.B por ai ka arritur t’a gjejë përsëri numrin. Pas kësaj, ai e ka kërcënuar se nëse nuk do të kryente marrëdhënie seksuale me të, do të bënte publike mesazhet.
Në këto kushte, ajo është detyruar të kryejë marrëdhënie seksuale me të. Kjo lidhje ka zgjatur rreth tre vjet deri në muajin Dhjetor 2019, kur bashkëshorti i saj është kthyer nga Greqia. Edhe gjatë kësaj kohe, shtetasi A.B. i ka kërkuar asaj të dilte dhe ta takonte dhe në momentin që bashkëshorti i saj ka qenë në shtëpi dhe si rezultat, këtë lidhje e ka marrë vesh i gjithë Poliçani.
Gjatë kësaj kohe, ajo ka tentuar disa herë të largohej nga A.B. duke ndërruar disa numra telefoni, por ai përsëri arrinte t’i gjente dhe të komunikonte me të, duke i thënë se do t’i tregonte burrit të saj dhe do t’i bënte publike mesazhet.
Kallëzuesja është shprehur se herë pas here kur ndërmjet tyre kanë patur debate, A.B. është shprehur se ja ku është pistoleta dhe do të vras ty dhe veten. Kjo gjë ka ndodhur edhe në automjetin e policisë, gjë për të cilën ajo është ndjerë e frikësuar. Kjo situatë ka zgjatur deri në muajin Dhjetor 2019. Në muajin Janar 2020, këtë lidhje e ka marrë vesh bashkëshorti i saj, dhe pas kësaj A.B. i ka thënë se nëse do të bënte denoncim ndaj tij, ai do të paraqitet në gjykatë dhe do të dëshmonte për heqjen e së drejtës së mbrojtjes së fëmijëve.
Dëshmia e bashkëshortit
I pyetur në lidhje e ngjarjen, shtetasi F.Sh. ka deklaruar se në muajin Janar 2020 është vënë në dijeni se bashkëshortja e tij O.Sh, ka rreth tre vite që ka marrëdhënie intime me shtetasin A.B., ku ai në këtë kohë ka qenë me punë në Greqi. F.Sh. për këtë ka patur debate me bashkëshorten, ku ajo ka marrë edhe një urdhër mbrojtje nga Gjykata e Beratit.
Ai e ka pyetur bashkëshorten për arsyen e lidhjes me A.B. dhe ajo është shprehur se ai i ka bërë presion herë pas here në mënyra të ndryshme për t’u lidhur me të dhe më pas ai i ka thënë se po nuk vazhdove lidhjen, do t’i them burrit dhe do ta bëj publike lidhjen.
Për këtë, F.Sh. është ndjerë i fyer dhe ka kërkuar zgjidhje ligjore.
Dëshmia e të akuzuarit
I pyetur në lidhje me ngjarjen si person që ka dijeni, shtetasi A.B ka shpjeguar se ka njohje me shtetasen O.Sh dhe ka patur komunikime me të në telefon dhe SMS deri në orët e vona. Ai ka deklaruar se nuk ka kryer marrëdhënie me të, ai shprehet se nuk e ka kërcënuar shtetasen në fjalë për të krijuar lidhje intime me të, por ka qenë ajo e cila i ka telefonuar dhe dërguar SMS.
