Kantautori i njohur italian, Franco Battiato, ka ndërruar jetë ditën e sotme në moshën 76-vjeçare. Ai kishte kohë që ishte i sëmurë, derisa mbylli sytë përgjithmonë në rezidencën e tij në Milo, raporton “La Reppublica”.
Lajmin e trishtë e konfirmoi familja e tij, e cila bëri të ditur se varrimi do të mbahet në një formë rreptësisht private.
Në karrierën e tij të gjatë, Franco krijoi këngë të paharrueshme si “La Cura”, “Centro di gravita permanente”, “Voglio vederti danzare”. Këngëtari kaloi në zhanre të ndryshme gjatë krijimtarisë së tij, duke eksperimentuar edhe me elektronikën.
Battiato ka drejtuar gjithashtu edhe disa filma përfshirë “Perdutoamor” dhe “Musikante”, që u prezantuan në “Festivalin e Filmit në Venecia”.
Këngët e tij unike, teksti i të cilave përmbante referenca filozofike, fetare dhe kulturore, i dha atij pseudonimin Il Maestro në skenën muzikore italiane.
Gjatë dekadave ai bashkëpunoi me disa muzikantë italianë dhe ndërkombëtarë dhe këngëtarë të estradës, veçanërisht me këngëtaren italiane Alice me të cilën Battiato përfaqësoi Italinë në garën e këngës “Eurovision 1984” me këngën “I treni di Tozeur”.
Kohët e fundit kryevepra e tij “La voce del padrone” u ribotua përpara 40 vjetorit të albumit.
