Presidenti Ilir Meta mori sot pjesë në takimin e 10-të të Udhëheqësve të Procesit të Brdo-Brijunit, që po zhvillohet në Qendrën e Kongresit të Brdos në Kranj.
Në këtë aktivitet ishin të pranishëm edhe krerët e shteteve të Kosovës, Kroacisë, Malit të Zi, Bosnje dhe Hercegovinës, Maqedonisë së Veriut dhe Serbisë.
Kreu i Shtetit shqiptar iu drejtua Takimit të Udhëheqësve të këtij Procesit shumë të rëndësishëm për të ardhmen e integrimit europian të të gjitha vendeve të Ballkanit Perëndimor me një fjalim, ku e vuri theksin te fakti se anëtarësimi europian është përparësia më e lartë dhe qëllimi strategjik kombëtar.
Sipas tij, kushtëzimi i vendosur nga BE-ja është një provë e rëndësishme për funksionimin e institucioneve demokratike dhe sundimin e ligjit.
