Komisioni hetimor për hetimin e shkeljeve kushtetuese nga Presidenti i Republikës së Shqipërisë nisi sot mbledhjen me pranimin e detyrës nga eksperti ligjor, Artan Spahiu.
Artan Spahiu është thirrur sot nga Komisioni, teksa ka deklaruar para anëtarëve se e pranon detyrën për të qenë ekspert ligjor pranë Komisionit Hetimor Parlamentar për shkarkimin e Metës.
Anëtari i komisionit Spartak Braho ka kërkuar të vihen në dispozicion pamjet filmime të presidenti Ilir Meta gjatë fushatës elektorale.
Në vijim të punës, para komisionit hetimor për shkarkimin e Metës u paraqitën disa video me deklaratat e kreut të shtetit, para zgjedhjeve të 25 prillit.
Videot nisin me përplasjen e presidentit Meta me policinë bashkiake në selinë e Frymës së Re Demokratike dhe vazhdojnë me deklaratat ku i bën thirrje qytetarëve që në 25 prill të rrëmbejnë cfurqet për të mbrojtur votën.
Sipas komisionit, këto janë të tjera prova që Ilir Meta ka shkelur Kushtetutën.
Ndërkohë, anëtarja e këtij komisioni, Klotilda Bushka citoi disa nga deklaratat e kreut të shtetit dhënë për mediet, apo edhe postimet në FB.
Kryetari i Komisioni Alket Hyseni tha se janë dhjetëra CD, përveç këtyre të paraqitura në komision, me deklarata të Metës. Ai ftoi secilin nga anëtarët që të njihen me volumin e pamjeve.
“E rëndësishme është që të referohen shqetësimet që ngrihen nga 49 deputetët. Secili nga ju nëse dëshiron të njihet me këto pamje, ne mund t’i publikojmë. Dua t’ju sqaroj që është e pamundur si kohë që ne t’i publikojmë. Ju njihuni me pamjet dhe çdo shqetësim mund të përcillet dhe ta trajtojmë në mbledhjet e ardhshme” tha Hyseni.
Ndërsa anëtarja e Komisionit, Klotilda Bushka tha se referuar kërkesës që kanë bërë 49 kolegët tanë për procedurën e shkarkimit, në argumentet që japin citohen materialet nga ku bazohen argumentet.
“Ju vë në dukje se një pjesë e materialeve ka të bëjë me deklarata nga studio televizive dhe një pjesë nga postimet në FB. Pjesën e materialeve vizive secili mund ta ketë në email. Për efekt të procedurës, ne i shfaqim, por është mirë që edhe anëtarët e komisionit t’i kenë këto pamje”, tha ajo.
