Bizneset e vendosur në zonën historike të Vlorës kanë mbyllur sot qepenat në shenjë proteste, pasi ankohen se pushteti vendor nuk merr asnjë masë, qoftë për pastrimin, qoftë edhe për tubacionet.
Sipas tyre po trajtohen në mënyrë të njëanshme nga bashkia, qoftë për taksat por edhe trajtimin e shërbimeve të bashkisë.
Bizneset janë mbyllur pikërisht sot, kur po në këtë zonë pritet të mbahet ceremonia zyrtare e çeljes së sezonit turistik.
“Problemet tona janë prezentë në zonë prej një kohe të gjatë, që i kemi bërë prezente dhe në bashki, ndërkohë që nuk është marrë asnjë masë.
Duhen makineri që të lajnë dhe të pastrojnë zonën, që turistët të mos ndihen keq, pasi i gjithë mundi ynë shkon totalisht dëm.
Do të vijojmë protestën derisa një përfaqësues i bashkisë të vijë dhe të na dëgjojë, ç’kuptim ka që të vazhdojmë të punojmë sa kohë që nuk dëgjohemi”, shprehet një prej biznesmenëve për “Fax News”.
Ndërkohë që një tjetër ngre shqetësimin për kafshët endacake, dhe për një pus që mund të shndërrohet në një problem për fëmijët, për shkak se nuk ka kapak.
“Mund të shihni koshat si janë, është papastërti gjithandej, jemi ankuar dhe nuk na kanë dëgjuar, ne duam mirëkuptim, që të gjithë bashkë të ndihmojmë zonën. Është gjynah që të jenë këto probleme këtu”, shprehet një tjetër prej pronarëve të bizneseve të zonës.
Mes problemeve të ngritura ishte dhe ai për kontrollet e shpeshta të policisë, për shkak se këtyre lokaleve që janë vendosur në zonë nuk u lejohet muzika.
