Mbyllet në barazim pa gola derbi numër 161-të mes Partizanit dhe Tiranës, i vlefshëm për javën e 33-të të Kategorisë Superiore.
Beteja në “Air Albania” ishte mjaft e luftuar, nuk i mungoi tensioni, tifozët, dhe emocionet.
Tirana në 45 minutat e para nuk arriti të ishte e rrezikshme te porta e Alban Hoxhës, ndërsa Jasir Asani goditi traversën 5 minuta nga fundit. Më parë Erald Çinari kishte parë t’i anulohej një gol, për pozicion jashtë loje.
Në pjesën e dytë skuadrat nuk kishin lirshmërinë e 45 minutave të para. Rasti më i mirë i shënimit u regjistrua pas një gabimi të Jurgen Bardhit. Taulant Seferi i Tiranës, sikurse ka bërë edhe herë tjetër, nuk ia doli të shënonte me një gjuajtje të fortë brenda zonës.
Në minutën e fundit Bekaj la portën dhe Najdovksi shpëtoi portën e Tiranës, ndërkohë që më pas në shtesë edhe Hoxhallari ishte vendimtar.
Partizani tentoi në minutat e fundit të shënonte dhe ushtroi presion, por pa sukses. Përfundimisht 0-0, me Partizanin që tashmë sheh Teutën t’i shkëputet në +3 pikë në kryesim.
