Partia Demokratike mbledh më 16 maj forumet e saj më të larta vendimmarrëse, Kryesinë dhe Këshillin Kombëtar për të vendosur mbi rrugën që do të ndiqet pas zgjedhjeve të 25 prillit.
Sipas njoftimit që u është shpërndarë anëtarëve të këtyre forumeve në rendin e ditës, ka diskutime dhe vendimmarrje për proceset politike pas situatës së krijuar me masakrën elektorale të zgjedhjeve të 25 prillit.
Një prej vendimeve që Lulzim Basha e forumet duhet të marrin lidhet me strukturat drejtuese të Partisë Demokratike.
Mandati i kreut demokrat Lulzim Basha përfundon më 22 korrik dhe nuk dihet nëse mbledhja e dy forumeve drejtuese ka të bëjë me ofrimin e datës së zgjedhjeve të brendshme, apo me vijimin normal të procesit. Nëse zgjedhjet do të afrohen në qershor, atëherë forumet drejtuese duhet të çelin garën, ndërkohë që mungon një analizë mbi atë se çfarë nuk funksionoi në rradhët e demokratëve, dhe që ka ndikuar në humbjen e zgjedhjeve, në kushtet kur pritshmëritë për një fitore ishin të larta.
Në kryesi, Basha do të ketë përballë Fatbardh Kadillin, i cili ka konfirmuar se në mbledhje do të kërkojë dorëheqjen e parevokueshme të Lulzim Bashës si përgjegjës për humbjen e zgjedhjeve. Kadilli është i vetmi demokrat që ka shpallur kandidaturen për postin e kreut të PD.
Në mbledhjen e Këshillit Kombëtar, kritiku më i fortë i Bashës është kryetari i këtij forumi, Bujar Nishani. Nishani është një prej anëtarëve të grupimit “për PD”, grupim i cili kërkon largimin e Bashës nga drejtimi i Partisë pas humbjes së zgjedhjeve të 25 prillit.
