Qeveria e përkohshme e Bullgarisë përjashtoi mundësinë e tërheqjes së vetos ndaj çeljes së negociatave për anëtarësim me Maqedoninë e Veriut. Në nëntorin e kaluar Bullgaria bllokoi rrugën e Shkupit drejt BE-së, për shkak të mosmarrëveshjeve lidhur me gjuhën dhe historinë.
Sofia akuzon fqinjin në Ballkanin Perëndimor për retorikë antibullgare dhe dështim në implementimin e një marrëveshjeje fqinjësore bilaterale.
“Pozicioni bullgar lidhur më çështjen është pranuar me konsensus mes të gjitha partive politike në parlament. Si qeveri tranzicioni nuk kemi autorizim për ta ndryshuar atë.”, deklaroi Ministri i Jashtëm, Svetlan Stoev.
Kabineti i tranzicionit, qe mori detyrën të mërkurën pasi partitë politike dështuan në përpjekjen për të krijuar një qeveri koalcioni, do të drejtojë Bullgarinë deri në 11 korrik, kur pritet të mbahen zgjedhjet e reja.
Stoev, një diplomat karriere tha se do të bënte të gjitha përpjekjet për të ruajtur dialogun me Shkupin.
“Sa na përket ne, çdo gjë është në duart e autoriteteve në Maqedoninë e Veriut. Ata e dinë shumë mirë pozicionin tonë dhe nuk duhet të spekulojnë se do të ketë ndryshime gjatë dy ose tre muajve të ardhshëm.”, deklaroi Stoev.
Bllokada e Sofjes ndaj Maqedonisë së Veriut po pengon edhe Shqiperinë ,ndërsa Bashkimi Europian e bëri të qartë se negociatat do të nisin njëkohësisht për të dyja vendet, pas zgjidhjes së mosmarrëveshjeve mes Shkupit dhe Sofjes.
